BAGUIO CITY – Agsapsapol ita ti grupo dagiti Korean businessmen iti tallo nga ektarya a lote sadiay La Trinidad a maaramat para iti maisingsingasing a makaipatakderan ti kimchi factory
Sigun ken La Trinidad Mayor Romeo Salda, nagtaod dagiti negosyante manipod iti maysa a syudad sadiay South Korea ken nangipeksa dagitoy iti interes a makatulong a makaipaay iti tulong kadagiti mannalon iti probinsya babaen iti pannakagatang dagiti natnateng dagitoy imbutaktakna a tarigagay dagiti negosyante a pagbalinen kas kimchi factory facility ti maysa nga ektarya bayat a ti dua ket mapagbalin kas vegetable production para kadagiti nateng a masapol iti panag aramid iti kimchi.
Inlawlawagna a saan nga umdas dagiti nateng a maala iti maaramid kas vegetable produksyon isut gapu a gumatangda metlaeng kadagiti nateng manipod kadagiti local farmers iti probinsya
Babaen iti daytoy ket matulungan dagiti mannalon ken magatang dagiti nateng nga agtaod kadagiti nagduduma a probinsya iti Benguet.
Kinunana nga addan dagiti lugar a sinarungkaran dagitoy a posible a makaipatakderan ti nasao a kimchi factory ngem saan dagitoy a nakapasa iti standard nga inlatang dagiti proponents iti proyekto gapu iti kinaadayo, kinarigat ti kasasaad ti kalsada ken transportasyon ken dadduma pay a rason
Dinakamatna a karaman kadagiti lote a sinukimat dagitoy ket masarakan sadiay Longlong, Puguis ken Buguias
Kagiddan iti dayta, nangipeksa ni Mayor Salda iti namnama a makabiruk dagiti Korean businessman iti lote a magatangda para iti pannakaituloy ti nasao a panggep a makatulong a mangital o iti probinsya kas major kimchi producer iti pagilian.
