Ipalpalagip ni Baguio City Mayor Benjamin Magalong a maipawil dagiti paputok wenno palibang bayat iti pannakarambak ti holiday season iti siudad.
Mainaig iti daytoy, awan pay met dagiti naawatna a reports manipod kadagiti kameng ti pulisya maipapan kadagitoy iti agdama.
Kinunana met nga adda dagiti grupo nga agkidkiddaw kenkuana a maipalubos ti panaglako manen kadagitoy ngem impaganetgetna a maipawil ti agaramat ti paputok iti siudad.
Mainaig iti daytoy, maipalagip a kadagiti napalpalabas nga uram, ti kangruna a rason kadagitoy ket human error.
Nupay kasta, kinunana a mabanbantayan ita dagiti posibilidad ti insidente ti uram, rason rason a nainget ti kampanya kontra kadagiti palibang a posible a mangitunda kadagitoy nga insidente.
Iti sabali a bangir, impasigurado ni Mayor Magalong a paingetenda ti panagbantay kadagiti aglako ken agaramat ti paputok.
Inakklonna a parikut latta dagiti aglako iti online, ngem inyunay-unayna a maaksyonan a dagus dagiti reports maipapan kadagiti agaramat ti paputok babaen iti tulong dagiti barangay officials a nabagaan nga imonitor dagiti lugarda.
Ipanpannakkel met ni Mayor Magalong ti napartak a panag-responde dagiti emergency medical services, pulisya ken dadduma pay a responders kadagiti reports iti 911.
Kinunana a kasapulan a maireport ti amin nga insidente a mainaig iti paputok kasta mer dagiti anyaman nga emergencies.
Impaganetgetna a naparpartak pay itan ti panag-responde dagiti maseknan a maysa a wagas a mangipasigurado ti kinatalged ti amin bayat iti holiday season.
