![](https://img.bomboradyo.com/baguio/2020/12/1.jpg)
BAGUIO CITY – Saan a kankanunungan ti DepEd-Cordillera ti maisaksakad a resolusyon a no-fail policy wennu ti pannakaipasa dagiti amin nga estudyante ita a semester kaggidan paylaeng iti panakaipawil ti face to face class gapu iti pandemya.
Sigun kenni DepEd CAR Regional Director Estella Carino, saanda a supsuportaran daytoy gaputa possible a saan a nasayaat ti epekto daytoy kadagiti estudyante nu maipasa laeng nga awanan iti basaran.
Sigun kenkuana, saan nga agpapada ti wagas a makaadal ti maysa nga estudyante isunga nasken a maamoan ti paglaingan wenno pagkapuyan dagitoy.
Kinunana pay a nasken a maikonsidera dagiti daduma nga estudyante gaputa adda dagiti mang-araramid iti kabaelanda tapnu makapasa ken dagiti saan a mangserseryoso kadagiti modules-da.
Dinakamat pay ni Carino a rinumwar iti survey dagitoy a kaaduan kadagiti nagganak wenno kapamilya ti maysa nga estudyante ti ad-adda nga agar-aramid wenno agsungsungbat kadagiti learning modules.
Inyunay-unayna pay nga iti baet ti mapaspasaran a pandemya ket puntirya dagitoy a manipangruna iti kalidad nga edukasyon para kadagiti estudyante.