Sinertipikaran ni President Ferdinand “Bongbong” Marcos Jr. ti gakat a pannakaitantan ti umuna a Bangsamoro Autonomous Region in Muslim Mindanao (BARMM) kas “urgent”, sigun kenni Senate President Francis “Chiz” Escudero.
Nupay kasta, saanna a dinakamat nu ti gakat a nasertipikaran kas “urgent” ket bersion ti Senado wenno ti House of Representatives.
Ti bersion ti Senado nga agdama a maikadua a mabasa, ket nangisingasing a mayakar ti eleksion ti BARMM manipud Mayo 11, 2025 agingga iti Agosto 11, 2025.
Ti gakat ket naaprobaran iti maikatlo ken maudi a pannakabasa iti House of Representatives ket nangisingasing a maitantan ti eleksion agingga iti Mayo 2026.
Imbinglay ni Escudero a napagsaritaandan kenni Senate Minority Leader Aquilino “Koko” Pimentel III ti pannakasertipikar ti gakat.
Ngem saan nga immanamong ni Pimentel iti ideya a maipasa ti gakat babaen ti presidential certification nga awanan ti pudno nga emerhensia.
