Kinondenar ti Land Transportation Office (LTO) ti pannakapapatay ti maysa kadagiti opisial dagitoy ken inawagan daytoy a “cowardly act” wenno takrot nga aramid.
Nabigbig ti biktima a ni Gutierrez, chief iti Registration Section iti Land Transportation Office Central Office.
Ni Gutierez ket ti babai nga immunan a naipadamg a napalpaltugan iti uneg ti van daytoy ken nakasuot ti Land Transportation Office Identification Card wenno LTO ID.
Dagos met a naitaray daytoy iti pag-agasan ngem indeklara ti maysa a doktor a pimmusay daytoy.
Sigun kadagiti otoridad, saan pay a nabigbig ti suspek a gunman a nakasakay iti maysa a motorcycle.
Impasigurado dagiti kameng ti pulisya iti panagreggetda tapno dagos a makemmeg ti suspek ken nakikoordinardan kadagiti dadduma a kameng ti Philippine National Police ken agtultuloy ti panagmonitor dagitoy.
Nakipagrikna metten dagiti otoridad kadagiti ay-ayaten ti pimmusay nga opisial.
Kabayatanna, nangbukelen ti Quezon City Police District (QCPD) iti Special Investigation Task Group (SITG) tapno mangipatungpal ti naan-anay a panagimbestigar ti insidente iti panagpalpaltog.
