Agoo, La Union- Linuktan ti maysa a lalaki manipod idiay Agoo, La Union ti maysa a papaya a maris “green” idi laeng Hulio 3, iti agdama a tawen.
Kadawyan a ti makitkita kalpasan a naluktan ti papaya ket ti bukel daytoy a maris black nu naluom ti papaya bayat a puraw a bukel nu naata paylaeng daytoy.
Ngem naidumduma ti linuktan ti lalaki a ni Jayson Cavinta a maimatangan iti video.
Iti interview ni Bombo Benjo Guzman babaen ti text message kenni Jocelyn Alcantara Lapurga, kasinsin ni Cavinta, kinunana a nasdaawda ti naimatangan dagitoy idi naluktan ti papaya.
Ti papaya gamin ket naglaon manen iti maysa pay a papaya.
Aklonen ni Lapurga nga umuna a gundaway ti pannakaimatangna ken dagiti kakadwana ti papaya a naglaon manen ti papaya.
Sigun kenni Lapurga, ti bukel daytoy ket ginatang ti ikitna a maysa a retired municipal agriculturist idiay Agoo ngem saanda nga ipagarup ti nakitada.
Iti agdama, dumanonen iti nasurok 800,000 views ti video a naipablaak iti nalatak nga application.
