BAGUIO CITY – Napunnon dagiti pasilidad ti Abra Provincial Hospital, partikular ti isolation building daytoy a para kadagiti pasiente ti COVID-19 ken dagiti nagpositibo iti rapid antigen testing gapu iti umad-adu a kaso ti COVID-19 sadiay Abra.
Gapu iti daytoy, inwaragawag ni Governor Joy Bernos a mangrugi ita nga aldaw, September 3 ket addan ti agserbi a COVID-19 Extension Facility iti ruar ti nasao a pagagasan para kadagiti suspected cases ti COVID-19.
Kasaruno daytoy ti panagbalin a viral sadiay Abra dagiti ladawan a pakakitaan kadagiti pasyente kadagiti hospital beds ken tent iti mismo a sangwanan ti parking area ti Abra Provincial Hospital.
Dinakamat ti gobernadora a dagiti pink tents ti temporaryo a treatment area dagiti nagpositibo iti rapid antigen testing bayat a maur-uray ti confirmatory tests dagitoy ken no adda ti mabakantean a silid iti isolation building ken COVID annex ti pagagasan.
Innayonna a mapagpili dagiti pasyente no kayatda ti agtalinaed iti temporary treatment area gaputa no saan ket mabalin met nga umakarda iti dadduma a pagagasan.
Sigun pay kenkuana, kitkitaenda ti panaka-aramat dagiti pasdek dagiti pagadalan kas temporary isolation area no maipalubos gaputa napunnon dagiti isolation facilities sadiay.
Maipalagip nga iti agdama ket naka-Enhanced Community Quaratine ti Abra agingga inton September 7.
