BAGUIO CITY – Pinalpaltogan dagiti saan pay a nabigbig a suspek ti maysa a pasyente iti uneg a mismo ti Far North Luzon General Hospital and Training Center sadiay Luna, Apayao idi rabii.
Nabigbig ti biktima a ni Andres Materum Jimenez, 47, naasawaan, driver ken residente ti Brgy Poblacion, Abulug, Cagayan.
Maibasar iti inisyal nga imbestigasyon ti Luna Municipal Police Station, nakaidda ti biktima iti kamana iti surgical ward ti nasao nga ospital idi simrek dagiti saan pay a nabigbig a suspek ken pinalpaltoganda daytoy.
Gapu iti daytoy ket nagsagrap ti biktima iti dua a tama ti paltog iti barukong daytoy.
Iti met panangiproseso ti scene of the crime operatives iti crime scene ket nakalaada iti lima a basyo, dua a bala, ken tallo a buli ti caliber 45 a paltog.
Naiyakar met ti biktima iti Cagayan Valley Medical Center sadiay Tuguegarao City para iti kanayunan a medical treatment.
Iti agdama ket saan pay laeng a maibaga dagiti otoridad nu anya ti motibo dagiti suspek iti nasao nga insidente.
