BAGUIO CITY – Agsapsapol ti Philippine Drug Enforcement Agency (PDEA) kadagiti interesado nga agbalin nga operatiba ti ahensia kagiddan ti naingetan a kampanya ti Duterte Administration kontra iti iligal a droga ditoy pagilian.
Sigun kenni Rosel Sarmiento, panakangiwat ti PDEA-Cordillera, kwalipikado nga agaplikar dagiti babbai ken lallaki nga agtawen iti 21 agingga 35, nakaturpos iti aniaman a 4-year course ken addaan iti professional eligibility.
Kinunana a dagiti lallaki nga aplikante ket nasken nga agtayag iti 5’2″ bayat a dagiti babbai ket agtayag iti 5′ ken dagiti kurang iti tayag ket mabalinda nga agala ti height waiver sadiay National Commission on Indigenous Peoples.
Innayonna a dagiti interesado nga aplikante ket mangisumitir laeng iti dua a documentary set dagiti kasapulan a dokumento iti opisina dagitoy sadiay Camp Bado Dangwa, La Trinidad, Benguet.
Maipasidong iti qualifying examination ken neuro-psychological exam dagiti aplikante ken dagiti makapasa ket agsanay iti las-ud ti innem a bulan.
Naamuan nga iti agdama ket 70 laeng dagiti operatiba ti PDEA a naiwaras kadagiti provincial field offices ti ahensia ditoy Cordillera.
