BAGUIO CITY – Killaat a ngimmato ti people mobility ditoy siudad ti Baguio iti napalpalabas a lawas.
Nailanad iti report ni City Health Officer Dr. Rowena Galpo a ti kangatuan a people mobility iti siudad iti uneg ti napalabas a 12 a bulan ti pandemya ket nailista idi napalabas a Dominggo, December 5.
Dinakamatna nga iti kaudian a Baguio metropolitan area mobility graphs ket nakita ti immado a panaggaraw dagiti tattao, partikular ti panagturongda kadagiti parke, terminal dagiti pagluganan, kadagiti retail businesses, recreational sites, kadagiti pagtrabahuan ken kadagiti pagtaengan.
Sigun met iti mayor ti siudad, ninamnamadan ti nasao nga insidente kagiddan ti panaglukat manen ti ekonomiya ti siudad kasaruno ti panaglukay ti quarantine status ti Baguio.
Nupay kasta, ipalpalagipna manen ti saan a panagbaybay-an dagiti tattao nangruna ita a holiday season tapnu masustinir ti panagbaba ti kaso ti COVID-19 ken saanen daytoy a ngumato pay.
