BAGUIO CITY – Nangrugin ti Libreng Sakay a programa ti Land Transportation Franchising and Regulatory Board sadiay Mt. Province idi kalman.
Dumanon iti sangapulo ket lima (15) a Modernized Public Utility Jeepneys (MPUJs) ti Bontoc Abatan Bauko Transport Cooperative (BABTSC) ti nangibiahe kadagiti pasahero iti ruta ti Bontoc-Bauko.
Immunan a nagbiahe dagiti sumagmamano a Modernized Public Utility Jeepneys (MPUJs) ti BAMAPCOM Entrepreneurs Multi- Purpose Cooperative ken Cordillera Basic Sectors Transport Service Cooperative idi Abril 14 iti ruta ti Baguio Plaza-Trancoville ken Baguio Plaza- Aurora Hill.
Simmaruno ti dua pulo ket lima a kanayonan a Modernized Public Utility Jeepneys (MPUJs) ti Kaaruba Transport Service Cooperative iti ruta ti Baguio Plaza-Trancoville idi Abril 15.
Manamnama a manayonan pay ti bilang dagiti pasahero iti Cordillera nga agnumar iti libreng sakay apaman a mailukat ti daduma a ruta ken manayonan ti yunit dagiti parapasahero a lugan nga agbiahe kadagiti sumarsaruno nga aldaw.
