Namnamaen ti Philippine Health Insurance Corporation (PhilHealth) a repasuen ni President Ferdinand “Bongbong” Marcos Jr. ti subsidy para iti sumaruno a tawen, kagiddan ti panangipasigurado ti nasao nga ahensia nga umdas paylaeng ti pondo para kadagiti benepisario.
Inaklon ni Dr. Israel Francis Pargas, Senior Vice President for PhilHealth’s Health Finance Policy Sector a naklaatda iti desision.
Ti subsidy, a pinunduan ti sin tax wenno buis ket mangsuporta kadagiti premium payments para kadagiti indirect contributors, sigun kenni Pargas.
Nupay kasta, impanamnamana a maitunos iti PhilHealth dagiti panggep daytoy iti kanito a maipinal ti zero subsidy.
Ti desision a mangkessay ti subsidy ti PhilHealth ket nagtaud iti P600 billion reserve funds, kas ti dinakamat ni Senate Finance Committee Chairperson Grace Poe bayat ti panagtaripnongda iti bicameral conference committee maipapan iti 2025 General Appropriations Bill (GAB).
Dinakamat ni Senate President Francis “Chiz” Escudero dagiti “lapses” ti PhilHealth kas rason iti pannakaikkat ti subsidy.
Daytoy ket kalpasan dagiti kontrobersia mainaig iti panangiyakar ti PhilHealth iti P89.9 billion a sobra a pondo iti national treasury.
Iti sidong ti 2024 National Expenditure Programme (NEP), nailatang ti PhilHealth iti P74.431 bilion, ken bimmaba iti P64.419 bilion babaen ti Senado.
Nupay kasta, napagdesisionan iti bicameral committee nga ikkatenda ti pondo para iti nasao nga ahensia.
Ti pinal a bersion ti 2025 GAB nga agarup P6.352 trillion, ket manamnama a pirmaan ni President Marcos inton Disiembre 20, 2024, sigun iti Presidential Communications Office.
