Impeksa ti Philippine Coast Guard (PCG) a ti Escoda Shoal ket paset ti Philippine’s exclusive economic zone kas nakabasar iti international law rason nga adda karbengan ti pagilian nga agoperate iti nasao a lugar.
Daytoy ti kinuna ni Philippine Coast Guard (PCG) spokeperson for the West Philippine Sea Commodore Jay Tarriela kalpasan a nangi-isyu ti Chinese Foreign Ministry iti panagprotesta gapu iti panakaadda ti BRP Teresa Magbanua sadiay Escoda Shoal.
Impaganetget ni Tarriela a saan a kasapulan nga agkiddaw iti permisso ti pagilian iti siasinuman para iti panagoperate daytoy agsipud ta tagikua ti Pilipinas ti nasao a lugar.
Sigun iti Chinese Foreign Ministry, sinumrek ti BRP Teresa Magbanua iti Escoda Shoal wenno bigbigbigenda kas Xianbin Jiao iti laksid a saan dagitoy a nagkiddaw iti permisso kasta met a nagtalinaed nagbayag dagitoy rason a daytoy ket panaglabsing iti soberanya ti China kas maibasar iti Declaration on the Conduct of Parties in the South China Sea (DOC).
Nu pay kasta, sinungbatan daytoy ni Tariella nga isardengda ti panagusar iti 2002 Declaration agsipud ta dagitoy ti saan a mangtungtungpal iti nasao a deklarasyon.
Innayon pay ni Tariella a ti China ti agtultuloy nga aglablabsing gapu iti panangideployda kadagiti dadakkel a barko sadiay.
