Bambantayan ti Philippine National Police-Philippine Drug Enforcement Group (PNP-PDEG) dagiti sumagmamano a lokal nga opisyales iti pagilian gapu iti maatap a pakainaiganda iti iligal a droga a mabalin nga usarenda para iti kampanya dagitoy inton umay a 2025 National elections.
Sigun kenni Philippine National Police-Philippine Drug Enforcement Group (PNP-PDEG) Director Police Brigadier General Eleazar Matta, nakaawatda iti reports manipud kadagiti sumagmamano a munisipalidad kadagiti probinsya maipapan iti iligal a distribution ti droga a maatap a mausar kas pondo inton sumaruno nga eleksyon.
Daytoy a ballaag ket natakuatan dagiti otoridad kalpasan ti panakakumpiskar ti P75 million a shabu iti naipatungpal a buy-bust operation sadiay Ermita, Manila.
Kinuna ni Matta a dagiti naarestar a suspek ket miyembro ti dakkel a sindikato a mangsupsupply iti droga iti pagilian.
Naamoan pay dagiti otoridad a dagitoy nga iligal a droga ket nalaka a maaramid ken mailako online.
Gapu iti dayta, agbalbalin a pakaseknan nu kasano a malapdan ti business transactions kadagiti iligal a droga iti cyber space.
