Saan a maal-alarma ti Philippine Navy iti agdama kasaruno ti pannakarekober ti underwater drone iti baybay a paset ti San Pascual, Masbate.
Sigun iti pannakangiwat ti Philippine Navy a ni Rear Admiral Roy Vincent Trinidad, ti drone ket nalawag ti marisna a maimatangan manipod iti tangatang.
Kinunana a kasapulan a sukimatenda ken maipasidong iti “analysis” tapno maibaga, ken maipasigurado nu sadinno ti nagtaudanna, anya ti pakaaramatanna, ken apay nga adda ti drone iti nasao a baybay.
Maipalagip nga idi Disiembre a trenta, nasarakan dagiti manggalap idiay San Pascual ti 2.72 ti kaatidogna a drone a tumtumpaw iti baybay.
Dagus met a kinita ti explosive ordinance disposal team ti Bicol Region Police ti nasao a “device”.
Kabayatanna, patien ni security analyst Rene De Castro a ti underwater drone ket posible a “military device.”
Kinuna ni Surigao del Norte Representative Ace Barbers a saan a masdaaw daytoy nu ar-aramiden ti China ti underwater surveillance iti tengga ti territorial dispute iti nagbaetan ti ti Beijing ken Pilipinas.
Awan pay ti komento iti agdama ti China Embassy ditoy Pilipinas seknan iti nasao a banag.
