Nangipatungpal ti Pilipinas, Estados Unidos, Japan ken Canada ti maritime activity idiay West Philippine Sea.
Sigun kenni Armed Forces of the Philippines Public Affairs Office chief Colonel Xerxes Trinidad, ti aktibidad ket napasamak idi kalman, Hunio 16 iti exclusive economic zone ti Pilipinas.
Iti social media ni Japanese Ambassador to the Philippines Endo Kazuya, kinumpirmarna ti nasao nga aktibidad nga addaan panggep a mapapigsa ti “regional” ken internasional a panagkaykaysa tapno magun-od ti ‘Free and Open Indo-Pacific (FOIP).”’
Idi napalabas nga Abril, pinanggep ti Pilipinas, Estados Unidos ken Japan ti panagkaykaysa a panagsanay.
Impasigurado ti tallo a pagilian a papigsaenda ti kooperasion dagitoy tapno maitandudo ti “domain awarenes” pakairamanan ti “humanitarian assistance” ken “disaster relief.”
Naituding met nga umawat ti Manila iti suporta para kadagiti programa ken proyekto a modernisasion manipud kadagiti dadduma a pagilian.
