Nabigbig ti pagilian a Pilipinas kas rank no.1 iti Southeast Asian country iti 2024 Paris Olympics bayat a daytoy ti rank no. 7 iti Asia.
Gapu iti dayta, pinadayawan ni Philippine Olympic Committee (POC) President Abraham “Bambol” Tolentino dagiti amin nga atleta a nakipaset kadagiti nagduduma nga ay-ayam a kas iti gymnastic, pole vault, boxing, swimming, golf, weighlifting, hurdler, ken daduma pay.
Para ita a 2024 Paris Olympics, nakagun-od ti pagilian iti dua a balitok a medalya manipud kenni Carlos Yulo iti gymnastic ken dua a bronze a medalya manipud kadagiti boksingero a da Aira Villegas ken Nesthy Petecio.
Daytoy ti mabigbigbig kas “best-ever performance” ti pagilian gapu ta naartapan ti nagbalin nga achivement idi Tokyo Olympics idi tawen 2021 nu sadino nakaiyawid dagiti atleta iti maysa a balitok a medalya, dua a silver ken maysa a bronze medal.
Sigun kenni Tolentino, panggepda pay a makaala iti kanayunan a medalya nupay kasta, addanen ti pagilian iti uppat a medalya.
Ni Yulo ti kaunaan a Pilipino nga atleta a nakagun-od iti dua a medalya iti maysa a setting ti Summer Games bayat a nanayunan ti medalya ni Petecio agsipud ta immuna nangabak daytoy iti silver a medalya idi napalabas a Tokyo Olympics kasta met a nagbalin a memorable ti Olympic debut ni Villegas gapu ta nangabak daytoy iti bronze a medalya.
Iti agdama, addaan ti pagilian iti sangapulo ket walo a medalya manipud idi damo a nakipaset daytoy iti Olympics a pakabuklan ti tallo a balitok a medalya, lima a silver ken sangapulo a bronze medal.
