Dumanunen iti 23 nga indibidual ti kompirmado a pimmusay gapu iti epekto ti Southwest Monsoon ken bagyo a Luis ken Maymay.
Maibasar iti datos ti Office of Civil Defense (OCD), dumanun iti 15 ti pimmusay iti probinsiya ti Benguet, pakairamanan ti siudad ti Baguio; sag-tallo iti Rizal ken Batangas bayat a maysa ti pimmusay iti Quezon.
Karaman kadagiti nasao a bilang dagiti pimmusay gapu iti panagreggaay, pannakalmes, rockslide, natupakan ti kayo ken dagiti nakoriente.
Mainaig iti dayta, 17 a tattao ti nadangran sadiay Ilocos Sur, Benguet, Abra, Rizal ken Cavite bayat a tallo ti agtultuloy paylaeng a mabirbiruk sadiay Batangas.
Kabayatanna, dumanon iti agarup 1,410,800 a pamilya wenno nasurok 4.9 million nga idibidual ti naapektaran iti Habagat ken dua a bagyo a dimmalapus iti Pilipinas.
Iti agdama, dumanon paylaeng iti 9,101 a pamilya wenno 31, 456 a tattao ti temporaryo nga agnanaed kadagiti 407 nga evacuation centers iti nagduduma a paset ti pagilian.
