NORTHERN COLORADO-Pimmusay ti 51-anyos a lalaki ken agarup tallo pullo ket uppat kadagiti tarakenna a baka ti pimmusay kalpasan a natamaan dagitoy iti kimat sadiay Northern Colorado itay nabiit.
Sigun kadagiti opisial iti nasao a lugar, nabigbig ti biktima a ni Mike Morgan ken napasamak ti insidente bayat ti panangpakanna kadagiti bakana iti ili ti Rand, agarup 120 a milia iti amianan a laud ti Denver.
Kabayatanna, maibasar iti datos ti Estadus Unidos, dumanon iti uppat a pullo ket uppat nga indibidual dagiti pimmusay gapu iti kimat, manipud 2006 angingga 2021 iti nasao a lugar.
Nupay kasta, kinuna iti United States Centers for Disease Control a manmano laeng dagiti makapapatay a kimat, no sadino 90% a tao ti makalasat manipud iti daytoy, iti laksid iti agarup uppat a million a daras iti panagkimat iti tunggal tawen.
