Manamnama a maiyawid ita a lawas wenno inton umay a lawas ti bangkay ni Marvil Facturan-Kocjancic, ti pinay a pinapatay ti foreigner nga asawana bayat ti panagbakasyonda idiay Slovenia.
Kasaruno daytoy ti agtultuloy a panag-apela ti pamilya a maipaayan iti hustisya ti ipupusay ni Marvil.
Sigun iti ina ti biktima a ni Vilma, naam-ammo ni Marvil ti asawana a ni Mitja Kocjancic iti online idi Pebrero 2024.
Bimmisita ni Mitja iti Pilipinas ken nagpropose kenni Marvil iti aldaw mismo ti panagkasangayna idi Hulyo 2024 ken nagkasarda iti nasao metlaeng a bulan.
Inladawan ni Vilma ti son-in-law daytoy a naanos ken awan ti nadnadlawna a saan a nasayaat a garaw ken ugali daytoy.
“He was good, and he treated her well,” Vilma said.
Kalpasan ti kallaysa dagiti dua, improseso ni Marvil dagiti kaskenan a dokumento sakbay a nagbiahe idiay Slovenia idi Disyembre 22, 2024 tapno makadwana ti asawana.
Nupay kasta, idi Disyembre 31 ket nakaawat ni Vilma iti awag manipud iti embahada ti Pilipinas a mangipakpakaammo a napapatay ti anakna.
Naklaat ni Vilma idi naipadamag kenkuana agsipud ta awan ti imbagbaga ti anakna a parikutna.
“They seemed so happy in their posts, so I was shocked when I received the news,” Vilma said.
Immunan nga impadamag dagiti Slovenian news reporter a binagbagsol ni Mitja ti asawana a ni Marvil a nangitunda iti ipupusayna.
Sigun iti report, sigud nga adda ti mental illness history ni Mitja ngem nu mapaneknekan dagiti otoridad a nakarekober daytoy idi inaramidna ti krimen ket sumango iti kaso a murder ken maibalud.
Iti agdama ket agtaltalinaed ti suspek iti mental institution.
Kidkiddawen met ita ti ina ni Marvil a maibalud ni Mitja. “Marvil deserves justice,” she said. “Her husband should be in prison, not in a mental institution.” Vilma added.
