BAGUIO CITY – Marigrigatan ita nga agdesision ti maysa a Pinay intern sadiay China, no agawid daytoy ditoy Pilipinas wenno agtalined latta sadiay China.
Iti interview ti Bombo Radyo Baguio, kinuna ni Maine Andaya Rivera, maysa nga intern sadiay Sanya, Hainan, China a karkaro a nagbalin a napeggad ti kasasaad sadiay gapu iti agtultuloy a panagwaras ti coronavirus disease wenno COVID 2019.
Dinakamatna a nagawiden ditoy Pilipinas ti dadduma a kakadwana a Pinoy intern sadiay.
Nupay kasta, impettengna a masapul nga ikonsiderana a naimbag ti agbalin a desision-na gapu ta tallo a tawenna nga inuray a maipatungpal ti internship-na sadiay China.
Dinakamat pay ni Rivera a nagdakkel unay ti gastos-na para iti internship ken sayang no agawid laeng daytoy nangruna ta saan met a mai-refund ti nabusbosna.
Iti baet daytoy, ikonkonsidera met laeng ni Rivera ti panagawidna iti Baguio City gaputa daytoy ti balakad ti inana.
Sigun pay kenkuana, maminsan laengen iti makalawas nga apan daytoy iti hotel a pagserserbian-na kas intern gapu iti nakaro a kina-istrikto dagiti otoridad ken arigna awan dagiti mapalpalubusan a rumuar.
