Nakailista ti Department of Health iti pito a kaso ti firecracker-related injuries sumagmamano nga aldaw sakbay ti holiday season.
Maibasar iti kaudian a datus ti health department, ti nasao a bilang ket agingga alas kwatro itay agsapa, Disyembre 23, 2025.
Dinakamat ti nasao nga ahensiya a ti nasao a bilang ket 75% a nababbaba nu idilig iti 28 a kaso a nailista iti kapada nga aldaw idi 2024.
Manipud iti pito a kaso, uppat kadagiti biktima ket agtawen iti 19-anyos nga agpababa.
Kaadoan kadagiti biktima ket nagsagrap iti dunor gapu iti panagpaputokda iti Boga ken five-star.
Immuna metten a kinuna ni Dra. Celia flor Brillantes, City Health Services Office nga adda ti dua a kaso ti firecracker-related injuries a nailista iti Baguio City.
Inyunay-unay met ti Department of Health a nu maputokan wenno matamaan kadagiti paputok ket dagus nga agturong iti kaasitgan nga ospital.
