BAGUIO CITY – Saan nga inaprobaran ti lokal a gobyerno ti La Trinidad, Benguet ti plano a panakaiyakar iti La Trinidad Vegetable Trading Post a masarakan sadiay Km. 5, Pico sadiay Benguet Agri-Pinoy Trading Center (BAPTC) a masarakan sadiay Km. 6, Betag.
Iti panakiyuman ti Bombo Radyo kenni Augusta Balanoy, panakabagi ti liga dagiti asosasyon iti La Trinidad Vegetable Trading Post, kinunana a saan nga impalubos da Mayor Romeo Salda ken Vice-Mayor Roderick Awingan ti nasao a plano.
Inlawlawagna a daytoy ket gaputa mapukawan iti kanayonan a pamastrekan ti lokal a gobyerno ti munisipyo no maaprobaran ti plano.
Dinakamatna a tinawen a makapapataud ti La Trinidad Vegetable Trading Post iti agarup P35-M a revenue.
Innayon pay ni Balanoy a napumpunno ti BAPTC bayat ti napalabas a holiday season iti baet a nailukat iti La Trinidad Vegetable Trading Post.
Kabayatanna, inyapelana ti ad-adda a panangsuportar dagiti opisyal ti gobyerno iti industriya ti agrikultura iti probinsia ken ti panangbuangay dagitoy kadagiti linteg tapnu marisut dagiti pakaseknan dagiti mannalon.
