Ciento-por-ciento itan a nakasagana ti Philippine National Police(PNP) para iti maangay a traslación iti Black Nazarene ita nga aldaw.
Sigun kenni Acting PNP Chief PLtGen. Jose Melencio Nartatez Jr., awanen ti kurang iti pwersa ti kapulisan para iti panangipatalged iti linak ken kappia iti nasao nga aktibidad.
Immuna metten a naiwaras dagiti pulis iti Quirino Grandstand gapu iti naekspektar a panagsangbay dagiti minilmilyon a deboto idi rabii, ti maudi a gundaway ita para iti pahalik.
Kabayatanna, nakasagana metten dagiti police assistance desk a mabalin a mangipaay iti tulong kadagiti deboto nga agkasapulan iti tulong nangruna dagiti senior citizens, persons with disability ken daduma pay a saklawen ti maibilang a priority citizens.
Malaksid iti dayta, adda metlaeng dagiti naka-sibilyan a pulis a naiwaras kasta metten dagiti intelligence units nga agbantay kadagiti untoward incidents a posible a mapasamak kas iti panagtakaw ken daduma pay a kita ti pananggundaway.
