BAGUIO CITY – “All set” ti Police Regional Office – Cordillera para iti umadanin a panangipila iti certificate of candidacy (COC).
Iti interview ti Bombo Radyo kenni Police Lieutenant Colonel Carol Lacuata, panakangiwat ti Police Regional Office – Cordillera, naipaulog ti operational guidelines para iti seguridad iti panangipila iti certificate of candidacy inton sumaruno a lawas.
Maideploy ti nasurok 1,100 a pulis ken special action force mangrugi inton Oktubre 1 agingga Oktubre 8 para iti seguridad dagiti mangipila iti nasao a certificate.
Sigun kenni PLtCol. Lacuata, ‘manageable’ ken kabaelan paylaeng dagiti kameng ti pulisya ti sitwasyon iti probinsiya ti Abra.
Namnamaenda a nasayaat ti panangipila iti certificate of candidacy iti nasao a probinsiya gapu iti pagannurotan ti Commission on Elections a tallo laeng nga indibidual ti sumurot iti agngayngayangay iti opisina dagitoy.
Impasiguradona pay a saan a nagulo gapu ta adda dagiti pulis a nakabantay iti entrance.
Kabayatanna, maal-allukoy dagiti pulis nga ipudnoda nu adda ti kabagianda nga agngayangay iti aniaman a posisyon para iti reshuffling wenno panakaiyakarda iti daduma a lugar.
