BAGUIO CITY – Mapagam-amkan nga agkurang ti pondo a maala ti lokal a gobierno ti Itogon, Benguet para iti 2021 gapu iti dakkel a gastos ken epekto ti agdama a pandemya.
Sigun ken Itogon Mayor Victorio Palangdan, dumanon iti P300-M ti nailatang a pondo dagitoy para iti tawen 2021 ngem naksayanen daytoy iti P40-M.
![](https://img.bomboradyo.com/baguio/2020/11/images.jpg)
Kinunana a posible pay a ngumato ti magastosda gapu iti agtultuloy a pananggato iti kaso ti COVID-19 sadiay Itogon.
Inlawlawagna a naaramat ti P40-M iti COVID-19 response kas iti pannakagatang dagiti PPEs, taraon dagiti pasyente, panakaipatakder dagiti isolation facilities ken pasweldo kadagiti job orders nga agtrabaho iti munisipyo tapnu tumulong kadagiti frontliners.
![](https://img.bomboradyo.com/baguio/2020/11/palangdan.jpg)
Inpanamnama ni Palangdan nga ikagumaanda nga agkiddaw iti tulong pinansyal manipud iti nasyonal a gobierno, provincial government ken Non-Government Organizations tapnu makaalada iti naan anay a pondo para iti Itogon, Benguet.