BAGUIO CITY – Pimmusay ti maysa a porter kalpasan a binagsol daytoy ti maysa a construction worker iti uneg ti maysa a balay-paginuman sadiay Calderon Street ditoy siudad ti Baguio idi kalman.
Nabigbig ti biktima a ni Jake Minaya Ronda aka Jun Minaya, 21-anyos, tubo ti Malasiqui, Pangasinan ken residente ti Padre Zamora Street bayat a nabigbig ti suspek a ni Rey Alvaina, 24-anyos, baro, tubo ti Taal, Batangas ken residente ti San Vicente, Poliwes, siudad ti Baguio.
Maibasar iti report, nagturong ti biktima ken dagiti kakaduana iti nasao a balay paginuman ken kabayatan ti panag-inomda iti arak ket immasideg kadakuada ti suspek.
Inguyod ti suspek ti maysa kadagiti tugaw ken impatongna iti daytoy ti maysa a sakana a nangitunda tapnu mainsulto ti biktima ken komprontarenna ti suspek a nagresulta iti nabara nga argumento.
Timmaray ti suspek paruar ken simrek iti maysa manen a balay paginuman ken iti panagsublina iti ayan ti biktima ket nakaimet iti kutsilyo ken sadiay a binagsol to suspek ti bikitima a nagresulta manen iti rambol nupay inanawa dagitoy dagiti kakadua ti biktima.
Timmaray manen ti suspek paturong iti balay paginuman nga immuna a nagalaanna ti kutsilyo isut gapuna kinamat daytoy ti biktima ken dagiti kakaduana ngem inrikep ti suspek ti ridaw.
Kalpasan ti sumagmamano a minutos ket natalimudaw ti biktima ken addan ti rumrumwar a dara iti tengngedna.
Dagus nga intaray daytoy dagiti kakaduana iti pagagasan ngem naideklara a dead on arrival.
