BAGUIO CITY – Posible a maiparikep dagiti swimming pools sadiay Itogon, Benguet iti kanito nga agtultuloy ti panaglabsingda kadagiti pagalagadan seknan iti COVID-19.
Iti panakiuman ti Bombo Radyo Baguio, kinuna ni Mayor Victorio Palangdan a binallaagandan dagiti agtagikua kadagiti swimming pools kalpasan a naobserbaran ti agtultuloy a panaglabsing dagitoy kadagiti pagalagadan.
Kinunana nga adda dagiti dadduma a swimming pools sadiay a mangipalpalubos iti panag-inom iti arak dagiti kostumer dagitoy iti baet nga epekto paylaeng ti liqour ban sadiay Itogon.
Innayonna a saan metlaeng a maminmintinir ti soial distancing gapu iti kaadu dagiti indibidual nga agturturong kadagiti swimming pools sadiay.
Gapu iti daytoy, inyulitna a posible a maipasardeng ti operasyon dagiti swimming pools gapu iti saan a panakasutoy ti katulagan a napirmaan iti nagbaetan ti lokal a gobyerno ti Itogon ken dagiti agtagikua kadagiti swimming pools.
Maipalagip a kalpasan a nailukat dagiti paglangoyan sadiay ‘trese’ wenno thirteen hundred level para laeng kadagiti umili ti Itogon ket nainayon a naipalubos ti panagturong sadiay dagiti umili iti Benguet ken Baguio City.
