BAGUIO CITY – Tubtubngaren ti lokal a gobyerno ti siyudad ti Baguio ti Resolution No.117, series of 2020 ti Land Transportationg Franchising and Regulatory Board (LTFRB) a nangipalubos iti panaglukat ti baro a prangkisa para iti 200 nga yunit ti taxi para iti rehion Cordillera.
Iti panakiuman ti Bombo Radyo Baguio kenni Councilor Benny Bomogao, dadaulo ti Committee on Public Utilities, Transportation, and Traffic Legislation iti City Council ti Baguio, kinunana a nabayagen a tubtubngarenda ti nasao a plano ngem saan nga inkankano ti LTFRB ti resolusyon nga impasada iti nasao nga ahensya.
Inlawlawagna nga adun ti agbibiahe a taxi ditoy siyudad a dumanon iti nasurok 3,200 isut gapuna a saanen a kasapulan ti kanayunan a taxi unit.
Kinunana a maysa nga ikonkonsederada ita ket ti kinailet dagiti kalkalada ditoy siudad.
Gapu iti daytoy, kinuna ni Coun. Bomogao nga imbilindan ti panagaramid ti Baguio Transport Technical Working Group iti position paper a mangipakita iti datus ken istatistika tapnu maawatan ti LTFRB ti kasasaad ti siyudad ken mangipakita iti kiddaw ti lokal a gobierno.
Innayonna a dagiti datus ken istatistika ti agbalin a basaranda iti panagaramidda ti resolusyon no ania ti agbalin nga takder dagitoy seknan iti nasao nga isyu a maidatag iti LTFRB.
Immunan nga inlawlawag ti LTFRB-Cordillera a dagiti 200 a taxi a maipaayan iti prangkisa ket mangsukat kadagiti taxi a nagpason iti prangkisana, naabandona ken nabaybay-an ditoy lokalidad.
