BAGUIO CITY – Maangay ditoy siudad ti Baguio City ti Miss Universe Philippines Bubble a bukbuklen dagiti pre-pageant events ken ti coronation night ti umuna a Miss Universe Philippines 2020 iti sidong ti baro nga organisasyon nga idadauloan ni 2011 Miss Universe 3rd Runner-Up Shamcey Supsup.
Sigun kenni Mayor Benjamin Magalong, nangipaay daytoy iti kondisyon ti tourism bubble ti Ms Universe PH kas iti panaggala dagiti organizer iti approval ti IATF a naala met dagitoy.
Maipasidong ti delegasyon a buklen ti 48 a kandidata ken 102 a production staff ken organizers iti nainget a health ken safety protocols ti siudad kas iti panakaisayangkat ti RT-PCR test sakbay a mapalubosan dagitoy a sumrek ditoy siudad.
Maipasidong manen dagitoy iti RT-PCR test kalpasan ti maika-lima nga aldawda ditoy siudad ken nasken nga agnaed laeng dagitoy iti masakopan ti Baguio Country Club.
Saan metlang a mapalubosan a sumrek dagiti agpositibo iti COVID test.
Manamnama a sumangpet ditoy siudad ita nga aldaw ti umuna a batch ti delegasyon ti Ms Universe PH 2020 ken agtalinaed dagitoy sadiay Baguio Country Club agingga intun Oktubre 25.
Naituding nga agturong ti delegasyon sadiay La trinidad, benguet para iti maysa nga special event sakbay ti panagturongda iti Baguio Country Club.
