BAGUIO CITY – Ngimmato iti 2.5 percent ti kadawyan a presyo dagiti gagatangen ken serbisyo iti rehiyon Cordillera iti bulan ti Marso ita a tawen.
Sigun kenni Philippine Statistics Authority – Cordillera regional director Villafe Alibuyog, nailista ti kangatuan nga inflation rate wenno panagngina dagiti gagatangen ken serbisyo sadiay probinsya ti Ifugao.
Simmaruno a nailista ti panagngato ti presyo dagiti gagatangen ken serbisyo sadiay Apayao, Kalinga, Abra, Mt. Province ken iti Benguet.
Kinunana a kangrunaan a ngimmina dagiti arak, sigarilyo, lames ken ti gatad iti serbisyo para iti salun-at.
Impannakkel met ni Alibuyog a saan a nagbaliw ti gatad ti serbisyo iti edukasyon.
Sigun pay kenkuana, babaen iti nasao a datus ket adda ti pagbasaran dagiti opisyales iti panangiwayatda iti kaskenan nga addang tapno matulungan dagiti negosyante ken consumers.
