Bimmaba ti presyo ti bagas iti merkado publiko iti siudad ti Baguio ita a bulan.
Iti pannakiuman ti Bombo Radyo kenni Jhon Paul Peralta, maysa kadagiti rice retailer iti Baguio City public market, kinunana a duritso ti panagbaba ti presyo ti nasao a bagas.
Sigun kenkuana, ti kababaan a lako dagitoy ket ti regular well milled rice a magatang iti P38 tunggal, magatang met ti well milled rice iti P40 agingga P42 tunggal kilo bayat a ti special rice ket magatang iti P45 tunggal kilo.
Kinunana a mailaklako dagitoy iti nababa a presyo gaputa daytoy dagiti ginatang dagiti retailers a saan a nailaklako dua a bulanen ti napalabas.
Nupay kasta, kinunana a napintas ti kalidad dagitoy.
Malaksid iti dayta, magatang met itan dagiti imported a bagas iti P50 nga agpangato tunggal kilo.
Kinunana a ti nangatuan ti presyona nga imported a bagas ket iti japonica a magatang iti P60 tunggal kilo.
Kabayatanna, innayonna metlaeng nga agsagsagana dagitoyen iti update ti kadiwa ng pangulo tapno makapagsagana dagitoy para iti nasao nga aktibidad.
