BAGUIO CITY- Agtaltalinaed ti presyo dagiti bagas iti Baguio City Public Market iti baet ti panagbalbaliw ti presyo dagiti produkto ti petrolyo.
Iti interview ti Bombo Radyo Baguio kenni John Paul Peralta, maysa nga retailer iti merkado publiko, kinunana nga awan ti nagbaliwan ti presyo dagiti bagas a mailaklako iti merkado ti siudad.
Sigun kenkuana magatang latta dagiti kalidad a bagas iti nababa a presyo iti baet dagiti nagsasaruno a panagngato ti presyo ti petrolyo a nakaapektar met iti transporasyon dagiti dadduma.
Iti agdama, agay-ayam iti P36 agingga P38 ti tunggal kilo ti regular milled rice; P40 agingga P46 ti tunggal kilo ti imported ken P34 agingga P35 ti tunggal kilo ti durog a bagas.
Malaksid iti dayta, awan met ti parikot iti pagtataudan ti supply ti bagas a mailaklako iti merkado.
Mainaig iti dayta, awan ti maiwan-wanawan dagiti rice retailers wenno vendors iti presensia dagiti maipuspuslit/smuggled a bagas iti merkado publiko.
Kinuna ni Peralta nga de kalidad dagiti mailaklako a bagas iti merkado publiko ken umdas pay ti supply-da kadagitoy.
Sigun pay kenkuana, mabanbantayan met ti nasao a banag iti merkado ti siudad nangruna ta agtitinulong dagiti rice retailers/vendors.
Malaksid iti dayta, sapasap wenno agpapada ti presyo nga itudtuding dagiti amin nga retailers nga aglaklako iti merkado.
Maipalagip nga kinuna ni Samahang Industriya ng Agrikultura (SINAG) Chairman Rosendo So nga talamak wenno agraraira ita dagiti smuggled a bagas iti nagduduma a merkado malaksid iti panagngato metten ti presyo dagiti agricultural commodities.
Iyum-umanda metten ti nasao a banag iti maskenan nga ahensia ti gobierno para iti panakaiwanawan dgitoy.
