BAGUIO CITY – Bimmaba ti presyo dagiti semento ken steel bars ditoy lokalidad kas maibasar iti kaudian a panagwanawan ti Department of Trade and Industry (DTI) – Baguio-Benguet.
Sigun kenni Cynthia Reyes, Trade Industry Development Specialist ti DTI – Baguio-Benguet, naksayan iti P5-6 ti presyo ti semento bayat a naksayan iti P1-9 ti presyo ti steel bars.
Maibasar iti price monitoring ti DTI – Baguio-Benguet, magatang ita iti P245 ti tunggal bag ti semento manipud iti P250 idi Mayo bayat a magatang ita iti P184 ti tunggal pidaso ti steel bars manipud iti P193 idi Mayo.
Patien ni Reyes a dakkel ti epekto ti naideklara a rainy season wenno panagtutudo iti panagbaba ti presyo dagiti sementoi ken steel bars.
Imbinglayna met nga stable ita ti presyo ken pagkasapulan iti semento ditoy lokalidad no idilig kadagiti napalpalabas a bulan a nangato ti pagkasapulan ti semento gapu kadagiti proyekto iti sidong ti Build Build Build Program ti Duterte Administration ken iti maintenance shutdown ti maysa kadagiti planta ti semento sadiay Region 2.
Agtultuloy met ti panangwanawan ti ahensia kadagiti paglakuan ditoy lokalidad tapnu mabantayan dagiti presyo dagiti materyales a maar-aramat iti konstuksion. [-with Bombo Charles Nikko Limon]
