Sinuspinder ti Department of Education (DepEd) Schools Division idiay Tacloban City ti klase dagiti tallo a pagadalan.
Daytoy ket kasaruno ti shooting incident a napasamak iti San Jose National High School a nakatayan ti tallo ken nakadangran ti 11 idi Lunes, June 22, 2026.
Maibasar iti Division Memorandum 406 a napitsaan idi June 22, sinuspinder ni schools division superintendent Sherlita Palma ti klase iti San Jose National High School, San Jose Central School, ken Manlurip Elementary School.
Nasuspinder ti klase agingga Martes, June 23, 2026.
Nailawlawag a ti napasamak a shooting incident ti rason iti pannakasuspinder ti klase.
Kabayatanna, naibilin a maisayangkat ti Psychological first aid (PFA) manipud Hunio 24 agingga 26, 2026.
Manamnama nga agsubli ti klase babaen iti face-to-face wenno alternative mode of learning kalpasan ti Psychological first aid (PFA).
Nakalanad metlaeng iti Division Memorandum 406 ti panangguyugoy iti tunggal maysa a mangidaton kadagiti kararag ken suporta para kadagiti biktima, pamiliada, ken iti intero a komunidad ti nasao a pagadalan.
Mainaig iti dayta, inkari ti DepEd Region VIII sadiay Eastern Visayas a mangipaayda ti suporta para kadagiti estudiante ken school personnels kasaruno ti nasamak nga insidente.
Kabayatanna, imbilin ni President Ferdinand Marcos Jr. Ti nainget nga imbestigasion iti shooting incident ken nangipaay iti pammilin tapno masigurado ti kinatged dagiti tattao kadagiti amin nga establisiemento, nangruna dagiti pagadalan.
