Impakaamo ni Senador Risa Hontiveros a posible nga adda pakainaigan iti nadara a pammaltog iti San Jose National High School idiay Tacloban City idi Hunio 22 ti “764,” maysa nga online extremist group a mapapati a mangguygoyugoy kadagiti agtutubo iti kinaranggas ken pornograpiya.
Iti panagdengngeg iti Senate Committee on Women, Children, Family Relations and Gender Equality, kinuna ni Hontiveros nga adda dagiti indikasion a naimpluwensiaan iti nihilistic violent extremism (NVE) network ti insidente.
Sigun kenkuana, ibilbilang iti FBI a pangta iti national security ti 764, bayat nga ibilbilang met iti Canada a terorista a grupo ti 764.
Kinuna metlaeng iti senador a mapapati nga ar-aramaten iti sumagmamano nga NVE network dagiti online game a kas iti Roblox, Minecraft, at GoreBox iti panagrekrut kadagiti agtutubo. Kinunana a naglaon dagiti nasao a grupo iti materiales seknan iti sextortion, panagaramid iti armas ken dadduma pay a narisgo nga aramid.
Inlawlawag ni Hontiveros a “lead” paylaeng dagiti nasao nga impormasion ken naipatuloden iti National Bureau of Investigation para iti panagberepikar ken imbestigasyon.
Impaganetgetna metlaeng a saanna a kidkiddawen ti panangipawil kadagiti video game, nu diket naing-inget a regulasyon ken natibtibker a panangsalaknib kontra iti online groomers at recruiters.’
