Kinumpirmar iti Police Regional Office 8 (PRO-8) a nangipiladan iti kaso a kriminal kontra iti 15-anyos a child in conflict with the law (CICL) a karaman iti pammaltog iti San Jose National High School idiay Tacloban City.
Sigun kenni PRO-8 Public Information Office chief Police Lieutenant Colonel Analiza Armeza, naipilan iti Prosecutor’s Office ti reklamo kontra iti menor de edad.
Agtultuloy metlaeng a maim-imbestigaran iti nagduduma a posible a motibo, karaman ti bullying.
Kinuna metlaeng ni Armeza a maipasidong iti restrictive custody ti babai a pulis nga agtagikua iti paltog a mapapati nga inaramat iti kaanakanna iti insidente, bayat nga agtultuloy ti administrative investigation kontra kenkuana.
Naipaay metten iti City Social Welfare and Development Office ti dua a child in conflict with the law (CICL) nga adda iti kostudia dagiti otoridad.
Posible metlaeng a pilaan ti pulisia iti kaso dagiti nagannak dagiti dua a suspek.
Maipalagip a tallo nga estudiante ti pimmusay ken adu pay ti nadangran iti napasamak a pammaltog idi Hunio 22.
Impasigurado met ni Armeza a paingtenda ti presensia dagitoy ken panagpatrolia kadagiti pagadalan kas maitunos iti direktiba ni PNP Chief Jose Melencio Nartatez Jr.
