Binilin iti Philippine National Police ti Anti-Cybercrime Group (ACG) ken dadduma pay nga unit a bantayan ken lapdan ti panagwaras iti online dagiti graphic video ken ladawan seknan kadagiti insidente iti kinaranggas iti pagadalan idiay Tacloban City ken Cavite.
Kasaruno iti agtultuloy nga imbestigasion iti pammaltog iti San Jose National High School idi Hunio 22, kasta metten ti nagsina nga insidente iti panagsaksak iti Cavite National High School ken Bethel Academy of General Trias.
Sigun kenni PNP Chief Jose Melencio Nartatez Jr., ti panagwaras iti content ket makadadael kadagiti biktima ken ti pamiliada ken rumbeng nga ibilang a serioso a panaglabsing iti dignidad ken privacy dagiti menor de edad.
Impaganetgetna a rumbeng a salakniban dagiti ubbing a karaman manipod iti online harassment ken saan a kasapulan ti “exposure.”
Nabilin metlaeng ti Anti-Cybercrime Group (ACG) a makikoordinar kadagiti social media platform para iti posible a panagikkat kadagiti content, bayat a mangisayangkat metlaeng iti saritaan dagiti lokal a pulisia kadagiti pagadalan ken komunidad para iti nataltalged a panagaramat iti social media.
