Kidkiddawen ni Akbayan party-list Rep. Chel Diokno ti imbestigasion kadagiti nagannak iti dua a menor de edad a karaman iti pammaltog iti maysa a pagadalan idiay Tacloban City, a sigun kenkuana ket mabalin a mapabasol metlaeng iti sidong iti Juvenile Justice Law.
Sigun kenni Diokno, rumbeng a sukimaten ti posible a kriminal ken sibil a panagsungbat dagiti nagannak maibasar iti lebel iti responsibilidad.
Impaganetgetna metlaeng ti panangpapigsa iti linteg iti paltog ken panangipataw iti nadagdagsen a pannusa kadagiti mangipalpalubos a makaala iti igam dagiti menor de edad.
Sigun iti Philippine National Police, maysa kadagiti suspek ti nagaramat iti 9mm pistol a mapapati a kukua iti pulis nga ikitna, a daytoy metlaeng ti nangisuro kenkuana iti panagaramat iti paltog.
