Saan a pabor ni Senador Risa Hontiveros iti singasing a maibaba ti minimum age iti criminal responsibility, ngem nakalukat a maamyendaran ti Republic Act No. 9344 wenno Juvenile Justice and Welfare Act tapno mapapigsa ti intervention ken diversion programs para kadagiti ubbing a karaman iti krimen.
Sigun kenni Hontiveros, rumbeng a mabaliwan ti linteg tapno marisut dagiti pagkurangan daytoy, karaman ti epektibo a panagsungbat kadagiti pangta iti digital space.
Rimmuar ti panawagan a maibaba ti edad iti criminal liability kalpasan ti napasamak a pammaltog iti maysa a pagadalan idiay Tacloban City idi Hunio 22 a nakatayan iti tallo nga estudinate.
Iti sidong iti agdama a linteg, dagiti ubbing nga agtawen iti 15 agpababa ket saan a responsable iti kaso a kriminal ken maipasidong iti intervention program, bayat a ti agtawen iti 15 agingga 18 ket mabalin laeng a responsable nu mapaneknekan a nagtignay nga addaan iti “discernment.”
