Dumanonen iti tallo ti nakumpirmar a pimmusay iti maysa a shooting incident idiay Banga National High School idiay Banga, South Cotabato pasado ala-una ita nga aldaw.
Sigun iti nakalap nga impormasyon ti Bombo Radyo Koronadal, inlawlawag ni Governor Reynaldo Sucayan Tamayo Jr., karaman kadagiti nadunor ti adda ita iti kritikal a sitwasyon a mannarimaan a matamtaming iti pagagasan.
Naiturong met dagiti dadduma pay a nadangran iti dadduma pay nga ospital iti nasao a lugar.
Kabayatanna, karaman metlaeng iti tallo a pimmusay ti suspek a maysa nga Grade 9 student.
Iti kaudian a casualty tally, tallo ti kumpirmado a pimmusay, sangapulo ti nadunor bayat a maysa ti adda ita iti kritikal a sitwasyon.
Sigun iti inisyal nga imbestigasyon, pinilit nga inala ti suspek ti 9mm a paltog ti nagannakna manipud iti vault iti pagtaenganda ken nagturong iti pagadalanda.
Iti pannakiuman met ti Bombo Radyo Koronadal kenni Banga Mayor Albert Palencia, dinakamatna a posible a ti pannakadismaya ti suspek iti naalana a nababa a grado ti nangitunda iti panangaramidna iti nasao a krimen. Nupay kasta, agtultuloy ti panangiberipikar dagiti otoridad iti nasao a motibo.
Dagos met a nasuspindir ti klase iti amin a pribado ken publiko a pagadalan idiay Banga gapu iti napasamak.
Agtultuloy ti imbestigasyon dagiti otoridad tapno maduktalan dagiti dadduma pay a detalye ti napasamak nga insidente.
