Impakaammo ti Department of Trade and Industry (DTI) kadagiti konsyumer ken retailers iti probinsya ti Benguet ti price freeze kadagiti kangrunaan a gagatangen iti Probinsya ti Benguet iti las-od ti 60 nga aldaw. Nangrugi metten daytoy a naipatungpal idi Agosto 24.
Kasaruno daytoy iti pannakaipasidung ti nasao a probinsya iti State of Calamity.
Sigun iti Section 6 ti Republic Act 7581 wenno Price Act, otomatiko a ma-freeze wenno agtalinaed dagiti presyo ti kangrunaan a gagatangen apaman a maipasidung ti maysa a lugar iti State of Calamity.
Saklawen ti nasao a direktiba dagiti produkto kas iti de lata ken dadduma a marine products, gatas, kape, sabon, kandila, tinapay, asin, instant noodles, ken danum a mainom.
Maipalagip a naipasidung ti probinsya iti State Of Calamity ita a bulan kalpasan a nailista ti agarup P1 Bilyon a danyos iti sektor ti agrikultura ken imprastraktura.
