Inawagan ti Malacañang ti publiko nga iturong kadagiti maseknan nga ahensia ti gobierno dagiti aniaman nga isyu, seknan iti mapampanggep a pannakaibangon ti Pax Silica industrial tech hub.
Sigun kenni Palace Press Officer Undersecretary Claire Castro, mabalin latta nga agbaliw dagiti probision ti United States-led initiative.
Inyunay-unay ni Atty. Castro nga ikonsidera ti gobierno amin a pakaseknan ti publiko mainaig iti Pax Silica, partikular dagiti epekto daytoy iti supaly ti danum ken koriente iti pagilian.
Inlawlawag ni Castro nga adda ti posibilidad a mabaliwan dagiti probision a makaipaay iti napimpintas a resulta para kadagiti Pilipino, pagilian ken kadagiti partners iti nasao a proyekto.
Maipalagip a dinakamat ni President Ferdinand “Bongbong” Marcos Jr. iti maikalima nga State of the Nation Address (SONA) daytoy a ti Pax Silica ket maysa nga AI-focused industrial complex a maipasdek iti 1,600 nga ektaria sadiay New Clark City, Tarlac.
Sigun kenni President Marcos Jr., mangipaay daytoy iti de kalidad a trabaho para kadagiti Pilipino iti pagilian.
