BAGUIO CITY – Inlawlawag ti Police Regional Office Cordillera (PROCor) ti kontrobersial a pannakaiyakar sadiay Apayao ti maysa a Traffic Management Unit ti Baguio City Police Office.
Impetteng ni PSSupt. Angelito Casimiro, deputy regional director on operations ti PROCor a saan a ti panangsitar ni SPO3 Alberto Tadeo iti driber ti nangato nga opersial ti pulisya ti rasun ti pannakayakar daytoy sadiay Apayao.
Kinunana a nakedngan a maiyakar ti nasao a traffic enforcer gapu iti “side comment” daytoy iti panangsitarna iti driber ni Senior Superintendent Greg Lim a naglabsing iti number coding system ti siudad. Saan a dinakamat ni Supt. Casimiro nu ania ti espisipiko a balikas nga insawang ni SPO3 Tadeo kontra iti nasitar a driber.
Mainaig iti daytoy ket palpalagipan ti PROCor ti amin a pulis a liklikanda ti mangisawang iti saan a maiparbeng a balikas kadagiti umili ken aramidenda laeng ti trabahoda. Dinakamat pay ti opisial a malaksid iti nasao a kaso ket adda met laeng ti pending case a misconduct ken nonfeasance kontra ken ni SPO3 Tadeo.
Maipalagip a mapagsarsaritaan agingga ita ti nasao nga insidente. Segun kadagiti residente ti siudad, agramanen dagiti taxi drivers, dakkel a pukaw ti panakaiyakar ni SPO3 Alberto Tadeo gaputa napukawan ti siudad iti maysa a pulis a responsable ken napudno iti sinapataanna a serbisyo.
Kinuna met ni City Mayor Mauricio Domogan a kasapulan ti siudad ni SPO3 Tadeo gaputa maysa daytoy kadagiti traffic enforcer a nagserbi iti siudad iti sumagmamanon a tawen. Innayunna pay a na-demoralized dagiti traffic enforcers ditoy siudad gapu iti kapanunotan a mabalinda a maiyakar iti dadduma a lugar nu aramidenda ti trabahoda kas iti panangsitarda kadagiti naimplwensiyaan a naglabsing iti linteg-trapiko. Maipalagip a sinitar ken pinalagipan laeng ni SPO3 Tadeo ti driver ti maysa a managan Senior Superintendent Greg Lim kalpasan a linabsingna ti number coding scheme ditoy siudad ti Baguio.
Nupay kasta, kalpasan ti sumagmamano nga aldaw ket imbilin ti Cordillera PNP ti panakaiyakar ni SPO3 Tadeo iti probinsya ti Apayao.
Immunan a nangputar iti resolusyon ti Traffic and Transport Management Committee a pinirmaan ti nagduduma a panakabagi dagiti regional line agencies para iti panakaisubli ni SPO3 Tadeo ditoy siudad ti Baguio.
