Inlawlawag ni Department of Budget and Management (DBM) Secretary Amenah Pangandaman nu apay a basbassit ti inaprobaran ti ahensya daytoy a pondo ti Department of Transportation (DOTr) inton sumaruno a tawen nu idilig iti kiddawda.
Daytoy ket gapu ta saan a prayoridad ti Department of Transportation (DOTr) ti Public Transport Modernization Program.
Sigun kenni Department of Transportation (DOTr) Undersecretary Andy Ortega, P2.9 billion ti kiddawda nga equity subsidy para iti panakamodernize dagiti jeepneys ngem agarup maysa a billion laeng ti inlatang ti Department of Budget and Management (DBM).
Nu pay kasta, kinuna ni Pangandaman a nu panggep dagitoy a manayunan ti pondoda inton sumaruno a tawen ket nasken nga agdawatda iti tulong iti kongreso agsipud ta saandan nga iggem ti budget.
Innayon ni Pangandaman a ngimmato ti pondo ti Department of Transportation (DOTr) inton sumaruno a tawen a dumanon iti P180.9 billion nu idilig iti P73.9 billion iti 2024 General Appropriations Act.
