Bimmaba ti kaso ti dengue iti siudad ti Baguio kalpasan dagiti sumagmamano a lawas kas maibasar iti datos ti City Health Services Office.
Nu pay kasta, rumbeng a saan nga agpakampante ti publiko nangruna ket dumanonen iti sangapulo ket lima ti pimmusay iti daytoy.
Maibasar iti kaudian a datos ti City Health Services Office idi Setyembre a dose iti agdama a tawen, dumanon iti 7, 387 ti kaso a nailista iti dengue.
Dagiti Top 10 barangays iti siudad nga addaan iti kaadoan a kaso ti denguet ket ti Irisan nga addaan iti 925 a kaso; Bakakeng Central a 460 a kaso; Asin Road a 426 a kaso; Pacdal a 241 a kaso; Santo Thomas Proper a 216 a kaso; Camp 7 a 213 a kaso; Loakan Proper a 195 a kasso; Gibraltar nga 186 a kaso; Pinget a 173 a kaso; ken Bakakeng North a 169 a kaso.
Kabayatanna, maiyun-unay ladta iti publiko ti panagpacheck-up dagitoy nu mariknada ti simtomas ti dengue kasta met a nasken a ti panagtalinaed ti kinadalus iti aglawlaw tapno maliklikan ti nasao a sakit.
