BAGUIO CITY- Mabalballaagan ti publiko nga agannad kontra kadagiti scam kas dagiti agwarwaras nga investment funds partikular ti paalaga system nga idiay-diaya dagiti scammer.
Iti pannakaiuman ti Bombo Radyo kenni Helen Veryan Valdez ti information officer ti Securities and exchange commission Baguio Extension Office, kinuna a daytoy ti bambantayan ken imonmonitorda tapno maliklikan dagiti kastoy nga insidente.
Sigun kenkuana, adu dagiti maaw-awat dagitoy a reklamo ken impormasyon kadagitoy kas ti panag-invest iti maysa a farm tapno gumatang ti baboy.
Kabayatanna, maibasar iti impormasyon ti nasao nga scammer ket adda ti main branch-da idiay Tarlac bayat nga adda pay ti branch-da iti nagduduma a lugar pakairamanan ti siudad ti Baguio, La Trinidad, Benguet, Ifugao, La Union ken dadduma pay.
Gapu iti daytoy, inyu-unay ni Valdez iti publiko nga agbalin a nasirib, nasken nga ammuen no scam daytoy wenno saan sakabay nga ag-invest ti kwarta.
Malaksid iti daytoy, nagiwaras pay dagitoy ken nagipost iti social media ti advisory tapno mapalagipan ti publiko tapno maliklikan dagitoy nga insidente.
