Nagpalagip manen iti publiko ni Eugene Buyucan, dadaulo ti General Services Office a ti waste management ket saan laeng a responsibilidad ti opisinada nu di ket responsibilidad metlaeng dagiti residente ti suidad ken dagiti bumarangay iti tunggal barangay iti Baguio City.
Daytoy ket kagiddan dagiti reklamo a maaw-awat ti opisinada manipod idiay barangay Ambiong gapu iti maatap a naladaw a pannakakolektar ti basura iti nasao a lugar a mangituntunda ti nadagsen a gunay ti trapiko sadiay.
Kinunana a gapu ta dagiti tattao metlaeng ti mangipatpataud ti bukodda a basura ket kasapulan nga agbalinda a responsable maipapan kadagitoy.
Impeksa pay a responsibilidad metlaeng dagiti barangay heads nga idauluan dagiti constituentsda.
Malaksid iti dayta, isuda metlaeng ti addaan iti desisyon maipapan iti collection point kadagiti basura rason nu apay a kasapulan a dagitoy ti agdesisyon nu anya a lugar ti itudingda tapno saan nga agbalin a parikut ti panagkolektar iti basura.
Innayunna pay a kasapulan nga ipasigurado metlaeng dagiti barangay officials a suruten ken agcomply dagiti constituentsda iti oras a panangirruar iti basura para iti garbage collection day tapno maliklikan dagiti parikut kas iti panangiwara dagiti walang nga aso kadagiti basura, panagdagsen ti gunay trapiko ken dadduma pay.
