BAGUIO CITY – Mangnamnama paylaeng ti pamilya ti maysa a pulis manipud Benguet nga agsansanay iti PNP-Special Action Force a masarakan daytoy kalpasan a naiyanod iti Lauis River sadiay Km. 27, Coto, Taltal, Masinloc, Zambales idi agsapa ti September 10, aldaw ti Martes.
Nabigbig daytoy a ni Patrolman Melvin Anacio Durante, 27-anyos, tubo ken residente ti Bokod, Benguet ken estudyante iti SAFCC Class 87-2018.
Maibasar iti report, ginandat ni Patrolman Durante a ballasiwen ti Lauis River tapnu iraked ti tali iti bangir a paset ti karayan tapnu aramaten ti Combat Group 4 ‘CHEETAH’ iti panagballasiwda iti karayan.
Nupay kasta, inguyod daytoy ti napigsa nga ayos ti danum agingga a napukaw.
Dagus a nangisayangkat dagiti kakadwana iti platoon iti search and rescue operation ngem saanda a nasarakan ti pulis.
Apaman a natawagan ti platoon leader ti Advance Command Post dagitoy kalpasan ti nasao nga operasyon, dagus a nakikoordinar ti Company Commander ti 23SAC ti PNP-SAF iti Masinloc MDRRM Office ken iti dua nga unit ti Provincial Mobile Force Company ti Zambales agingga iti alas otso iti rabii ti Martes.
Naituloy ti operasyon iti agsapa ti Miyerkoles kabinnadangen dagti residente ti Sitio Coto, pakairamanan dagiti estudyante dagiti nagduduma a Combat Group ti PNP-SAF.
Timmulong metlaneg ti Airbus Helicopter ti Air Unit ti pulisya iti search operation babaen iti tangatang iti deppaar ti Lauis River.
Maitultuloy ti nasao a search and rescue operation agingga a masarakan ni Patrolman Durante.
Naamuan nga ita a malem ket nangisayangkat dagiti Igorot a SAF troopers sadiay iti ritwal a daw-es para iti naparpartak a panakasarak ti mapukpukaw a pulis.
Indonar ni Masinloc Mayor Arsenia Jalata Lim ti naaramat a baboy iti nasao a ritwal.
