Kangrunaan a parikut dagiti indibidual nga agpangpanggep a mangrugi iti negosyoda ket ti kinakurang iti kapital wenno puonan.
Sigun kenni Felicitas Bandonill, Provincial Director iti Department of Trade and Industry Baguio-Benguet, ti nasao a pakaseknan ti kangrunaan a maiyum-uman kadakuada.
Gapu iti dayta, imbinglayna nga adda ti financing arm ti Department of Trade and Industry nga agpapautang para kadagiti indibidual nga agparparikut ti pangalaanda iti puonan wenno kapital.
Sigun ken Bandonill, saan a mismo a ti DTI ti mangipapautang iti puonan gapu ta daytoy ket maysa nga opisina.
Nupay kasta, inlawlawagna a ti financing arm daytoy ket iti metlaeng sidong iti nasao nga opisina.
Innayon ni Bandonill a para kadagiti babassit nga enterprises, ti ar-aramiden ti small business corporation ket pautangenda dagitoy kadagiti financing institutions kas iti cooperatives nu sadino, dagiti cooperatives mismo ti agpabulod iti kuarta kadagiti small micro entrepreneurs.
Mainaig iti dayta, inyebkas ni Bandonill a manipud iti panangirehistro iti negosyo agingga iti panangimarketda kadagiti produkto ket nakaasistar latta ti DTI kadagiti entrepreneurs.
Innayonna pay nga adda dagiti Negosyo Centers kadagiti nagduduma a munisipyo nu sadino, babaen iti daytoy ket maipasidong iti training dagiti entrepreneurs, adda ti shared service facility a mangipapaay iti equipment kadagiti entrepreneur, mentor, business counseling, ken dadduma pay.
Innayonna nga iti probinsya ti Benguet ken siudad ti Baguio ket manipud iti nasurok 30,000 nga MSMEs ket agarup 10,000 ti naipaayanen iti tulong ti Department of Trade and Industry.//Bombo Genzel Depayso
